O delegado do Goberno en Galicia, José Miñones, mostrou este mércores a súa confianza na capacidade e no potencial da industria primaria de Galicia para ser protagonista do PERTE Agroalimentario, que mobilizará 1.002 millóns de euros para fortalecer a un sector que en Galicia "representa case un 7% do PIB con máis de 100.000 empregos na comunidade".
José Miñones desprazouse á factoría de Clesa, en Caldas de Reis onde presentou á dirección da Cooperativa Clun o contido do Plan Estratéxico de Recuperación e Transformación do sector agroalimentario aprobado en febreiro, máis coñecido como PERTE agroalimentario.
No seu percorrido pola planta, estivo acompañado pola subdelegada do Goberno en Pontevedra, Maica Larriba e o alcalde de Caldas de Reis, Juan Manuel Rey mentres que por parte de Clun asistiron o presidente da Cooperativa, José Ángel Blanco, e o seu director xeral, Juan Gallástegui.
O delegado do Goberno puxo a Clun, que cumpre agora cinco anos de traxectoria, e á factoría de Clesa, como exemplo de como este sector en Galicia "soubo adaptarse e crecer nun mercado competitivo e tremendamente esixente como é o lácteo, e de como soubo sobrepoñerse aos obstáculos".
Miñones trasladou ao conxunto do sector que o Goberno de España e a Delegación en Galicia "son os seus aliados neste camiño" e avanzou que o Ministerio de Industria xa traballa na convocatoria de axudas para fortalecer a industria agroalimentaria, que concederán 400 millóns de euros para proxectos de mellora da produción.