O voceiro do grupo municipal do Partido Popular, Jacobo Moreira, solicitou este xoves o apoio expreso do PSdeG-PSOE de Pontevedra á cadea humana que o próximo sábado reivindicará a apertura inmediata da ponte da Barca para o tráfico en dirección a Poio. Fíxoo cunha chamada telefónica ao tenente de alcalde Antón Louro, que non se pronunciou.
Así mesmo, Moreira invitou a representantes da delegación de Anova na cidade de Pontevedra a que se sumen ao acto, e tamén púxose en contacto cos responsables de varias asociacións e federacións veciñais de Pontevedra, algunhas das cales xa confirmaron a súa intención de acudir ao acto.
Moreira e o seu homólogo en Poio, Ángel Moldes, presentaron esta mañá na Subdelegación do Goberno a solicitude oficial para celebrar a acción reivindicativa, convocada para as 12:30 da mañá do sábado.