O vindeiro mércores 29 de outubro, a Universidade Nacional de Educación a Distancia (UNED) organiza o seminario online "Morrer ben ou morrer mal: A morte desde a perspectiva dos coidados paliativos".
É unha cita pensada para reflexionar con serenidade e profundidade sobre un dos temas máis universais e, a miúdo, máis difíciles de abordar como é o final da vida.
A actividade, coordinada por Rafael Cotelo Pazos, responsable do Departamento de Extensión Universitaria e Actividades Culturais da UNED en Pontevedra, contará coa participación de dúas destacadas expertas no ámbito dos coidados paliativos.
Son Lourdes Chocarro González, enfermeira e doutora en Socioloxía, e Purificación González Villanueva, profesora de Enfermaría na Universidade de Alcalá.
Durante as dúas horas que dura o encontro, abrirase un espazo de diálogo para explorar que entendemos por "unha boa morte", como se aplican os coidados paliativos en España -tanto en adultos como en nenos- e cales son os principios, valores e dilemas éticos que acompañan este proceso.
Tamén se abordarán temas prácticos, como o documento de vontades anticipadas, e ofreceranse claves sobre a planificación compartida da atención.
O programa comezará cunha reflexión inicial sobre que significa morrer ben, para despois profundar nos estándar de calidade dos coidados paliativos e a súa situación actual no sistema sanitario español.
Todo iso co obxectivo de promover unha mirada máis humana, respectuosa e consciente cara á morte, entendida como parte natural da vida.
A inscrición é gratuíta e pode realizarse facilmente a través do portal de Extensión Universitaria da UNED. Non é necesario desprazarse, xa que o seminario se ofrecerá completamente online, tanto en directo como en diferido.
Esta proposta enmárcase dentro do compromiso da UNED coa divulgación do coñecemento, a formación continua e a promoción de valores ligados ao benestar, a saúde e a dignidade humana, en liña cos Obxectivos de Desenvolvemento Sostible.