Todos os traballos para a museografía do novo centro de interpretación da Telleira, en Sanxenxo, terán un custo de 113.582 euros.
O obxectivo é que o espazo se converta nun foco de difusión dos valores ecolóxico e etnográficos de toda a zona, que fomente o turismo ambiental e ornitolóxico, especialmente nos meses de outono e inverno, cando máis de 200 especies de aves elixen este humidal para invernar.
O Concello de Sanxenxo acaba de sacar a licitación a actuación, cun prazo de execución de tres meses.
O proxecto inclúe a dotación de mobiliario, dispositivos multimedia de almacenamento e lectura, equipo audiovisual, paneis e servizos de exposición en museos.
A musealización deberá garantir a accesibilidade e a comprensión dos contidos para públicos diversos, atendendo a distintos rangos de idade, orixe, nacionalidade e nivel educativo.
Ademais, o resultado deberá ser atractivo, didáctico e inclusivo, ofrecendo diferentes niveis de profundidade para adaptarse tanto a visitantes ocasionais como a aqueles interesados nun coñecemento máis detallado.
Este centro, construído en 2003, está a ser obxecto dunha mellora integral co obxectivo de que esta poida albergar as actividades para as que foi concibido, pero aumentando os seus estándar ambientais interiores e a eficiencia enerxética.
Os traballos céntranse agora na colocación da climatización interior.
A redistribución do espazo interior incluirá a oficina de Medio Ambiente, a sede de SEO BirdLife, unha sala de exposición permanente, unha sala multiusos, un espazo para talleres de interpretación, un almacén, un centro de documentación, unha sala audiovisual, unha sala de exposición itinerante, unha tenda temática e aseos.