O Concello de Sanxenxo repetirá iniciativa este Nadal para implicar as asociacións do municipio na decoración desta época festiva.
Así, tras a boa acollida do ano pasado, volveu a pór en marcha, a iniciativa 'Unha asociación, unha árbore' coa que creará once 'Recunchos de Nadal'.
O Concello doará a asociacións un total de 48 abetos para decorar eles mesmos en once espazos diferentes.
As once localizacións serán o parque do Espiñeiro, a praza de Méndez Núñez, o parque de Panadeira, A Bouza (Dorrón), a Carballeira (Noalla), a capela de Aios, a praza pública de Vilalonga, a capela do Santo (Nantes), a igrexa de Adina e o Priorado de Arra. Cada "recuncho" elixirá o seu día de encendido.
A concelleira de Cultura e Eventos, Elena Torres, explicou que a idea é "poder facer unha ruta polas distintas parroquias e que cada colectivo poida colaborar coa animación e decoración da súa parroquia.
O Concello tamén colaborará con rosca e con chocolate con aqueles colectivos que realicen festa do inicio da iluminación.
O municipio xa está en plena conta atrás para o Nadal. A empresa Creaciones Luminosas comezou hai uns días a colocación dos 345 motivos do Nadal por 84 espazos diferentes das sete parroquias do municipio.
O encendido realizarase o 5 de decembro na Praza dos Barcos e, a continuación, inaugurarase o Pazo de Nadal, unha gran carpa con mercado, actividades e pista de xeo que se instalará na Praza do Mar.
O prazo de solicitude dunha caseta no mercado para a venda de produtos de proximidade finaliza o 23 de novembro.