"Non podemos permitir que despois de tanto tempo de espera déixese unha parte do pobo sen a mellora comprometida", recalcou este venres o concelleiro de Urbanismo e Promoción Económica de Poio, Gregorio Agís, en referencia á reunión mantida coa presidenta de Portos de Galicia para a presentación do proxecto da zona portuaria de Raxó.
Gregorio Agís lembra que esta actuación estaba prevista desde o ano 2009 cun proxecto cun importe dun millón e medio de euros "desde a estrada autonómica PO-308 ata o porto "cun empedrado e criterios de calidade, e financiada integramente por Portos de Galicia", subliña.
"Despois de 13 anos de incumprimentos preséntase novamente outro proxecto, ao que expomos unha serie de obxeccións tanto desde o Concello como desde os colectivos que asistiron á reunión", sinala o concelleiro de Urbanismo.
Segundo traslada o edil socialista, o primeiro punto a destacar é que "se reduce o ámbito de actuación e exponse unha plataforma única de formigón só desde o final da pasarela de madeira ata o porto deixando desde a PO-308 ata a zona da praia co mesmo tratamento actual".
"Entendemos que é necesario deseñar e incluír no proxecto ese espazo", recalcou Agís.
En segundo lugar, outro aspecto tratado na reunión e que sinalou Gregorio Agís é que "unha plataforma única de formigón sen ningún elemento de pedra nunha superficie tan extensa pode quedar moi árido e expúxose a necesidade de incorporar algún pavimento de pedra que achegue calidade e acabado ao espazo".
Segundo o concelleiro, a postura do concello e dos colectivos móstrase "construtiva e facilitadora, para que dunha vez por todas se poda desenvolver un proxecto tan necesario para esta contorna".