Notable expectación para completar a Feira da Peregrina ao grande

O segundo e último festexo da presente Feira Taurina da Peregrina conta desde este venres nos currais de San Roque cos touros previstos para lidar e que lucirán a divisa de Santiago Domecq. O ferro gaditano repite nestes festexos taurinos da cidade do Lérez e nesta ocasión contarán coa asistencia do seu gandeiro tal e como nos dicía esta mesma semana en PontevedraViva Radio.

Espérase que así sexa tamén cos tres destros que compoñen este cartel dominical e que non se produzan contratempos nos compromisos previos que teñen antes deste domingo 13 de agosto. Quen máis incerteza podía suscitar é José Antonio Morante de la Puebla, quen anunciara a súa reaparición o pasado un de agosto en Azpeitia tras o contratempo sufrido en Badaxoz en xullo. Concretamente unha lesión nos ligamentos da boneca. Finalmente non puido acudir ao festexo guipuscoano e tampouco aos posteriores en Huelva máis El Puerto a pasada fin de semana. A súa reaparición produciuse este mesmo venres en Huesca e antes de regresar a Pontevedra cumprirá o seu contrato en el Puerto.

Outro destro que tamén viu abruptamente interrompida a súa tempada é José María Manzanares, no seu caso, o mes de xuño por unha intervención cervical. Retomaba a actividade ante a afección a pasada fin de semana en Huelva e tamén cumpría este xoves cun festexo en Palma de Mallorca.

E sorpresa doutro tipo daba este pasado xullo o espada que completa o festexo. De forma inesperada, polo menos para o público taurino, anunciaba a través dun comunicado a súa retirada dos ruedos "indefinidamente" Julián López 'El Juli'. Un adeus que supón que este domingo sería a última ocasión para ver ao toureiro madrileño vestido de luces na praza pontevedresa.

Unha tarde por tanto de máxima expectación para a afección local e para a foránea que nutridamente tamén acode ao coso de San Roque. No caso da primeira non hai dúbida que a entrega con 'El Juli' será incuestionable xa que viron a progresión dun toureiro case neno ata chegar ao mestre que este 2023 cumpre 25 anos nos ruedos desde a súa alternativa. Antes de chegar a Pontevedra, Julián López ten festexo sinalado na localidade francesa de Dax este sábado.