Máis de doce millóns de euros investirá a Xunta de Galicia na construción do novo emisario submarino da depuradora dos Praceres, actuación para a que nove empresas presentaron as súas ofertas para elaborar o proxecto e executar as obras.
Esta obra hidráulica está declarada de interese da comunidade autónoma no plan hidrolóxico da demarcación hidrográfica de Galicia-Costa.
A actuación divídese na obra terrestre, que se corresponde coa execución da cámara de carga e estación de bombeo a emisario, e no emisario submarino.
As obras proxectadas darán servizo a unha poboación aproximada de 141.204 habitantes para o ano horizonte 2042, segundo destaca o goberno galego.
O novo emisario submarino separará os vertidos industriais e os residuais e contará coas dimensións axeitada ás necesidades actuais e futuras
Este proxecto, recorda a Xunta de Galicia, incorporou varias modificacións coa fin de dar solución ás cuestións suxeridas no proceso de información pública, o que supuxo un incremento duns dous millóns de euros no orzamento.
Así, modificouse a localización da cámara de carga e da estación de bombeo a fin de reducir o seu impacto visual, deixando libre a fachada litoral. Tamén se incrementou a lonxitude do tramo inicial no túnel do emisario para non afectar aos bancos marisqueiros a pé de Praceres, sen que esta medida implique un incremento do volume de escavación.
Ademais deste proxecto, a Consellería de Infraestruturas e Mobilidade adxudicará nos próximos días o contrato de mellora da estación depuradora, superando os 28 millóns de euros mobilizados na depuración da ría de Pontevedra.
Engade Pontevedra Viva como fonte preferida de Google de balde
Mantente informado coas últimas noticias de actualidade.