O novo centro socioeducativo das Lagoas xa é unha realidade. Polo menos, no que ao edificio se refire. E é que as obras de rehabilitación do interior e do exterior das instalacións xa terminaron.
As obras deixan como resultado, segundo destacou o goberno municipal, un espazo "moderno, sostible e pensado para dar resposta ás necesidades formativas, culturais e sociais de Sanxenxo".
O alcalde, Telmo Martín, xa asinou a recepción dos traballos do edificio municipal, que albergará a curto prazo un ciclo de FP Dual de Hostalaría e Restauración, un centro social de maiores e unha biblioteca.
O centro será equipado nos próximos meses.
A intervención non só se centrou na funcionalidade do edificio, senón tamén na eficiencia enerxética xa que conta con paneis solares, iluminación LED e unha envolvente renovada con novos illamentos e carpintaría exterior.
Así, no que antes era o ximnasio do colexio habilitouse un amplo centro social de 375 metros cadrados. Tamén na planta baixa sitúase a nova biblioteca, con 185 metros cadrados e zona de estudo, espazo infantil, ordenadores, arquivo e aseos.
Como valor engadido, o centro disporá dun acolledor patio axardinado para lecturas ao aire libre, presentacións de libros ou actividades infantís.
Ambos os espazos, biblioteca e centro social, teñen accesos e servizos propios, o que permitirá que funcionen de forma independente ao resto do edificio, mesmo con horarios distintos.
Nas plantas superiores, que suman máis de 1.000 metros cadrados, estará o ciclo de FP Dual de Hostalaría e Restauración. Este centro educativo contará con aulas polivalentes, talleres de cociña e restaurante e até un bar de prácticas.
Todo iso estará conectado mediante un ascensor para facilitar a accesibilidade.
Engade Pontevedra Viva como fonte preferida de Google de balde
Mantente informado coas últimas noticias de actualidade.