A Policía Local de Sanxenxo tivo que intervir á primeira hora deste sábado na praia da Carabuxeira tras producirse novos derrubamentos no muro dunha vivenda.
Trátase da mesma propiedade que a principios de abril xa sufriu o derrubamento de parte do muro debido entre outros aspectos ás intensas choivas e temporais dos últimos meses.
A propietaria do inmoble foi entón alertada da situación, mentres que o Concello de Sanxenxo comunicou o derrube a Costas.
A zona foi entón precintada debido ao perigo de novos derrubamentos, xa que muro non só sostiña o xardín frontal da vivenda senón tamén unha edificación usada como almacén ou garaxe.
Tras este novo suceso o Concello de Sanxenxo lembrou que tenta tramitar desde 2018 a recuperación da fachada marítima do litoral cunha pasarela que permita o acceso público e comunique a praia da Carabuxeira, Lavapanos e Panadeira.