Unha ateigada Praza dos Barcos serviu como escenario de excepción para unha nova edición, a número 41, da Feira da Cebola de Sanxenxo.
Tal foi a expectación que os máis de 44 postos da cita serviron produtos ata esgotalo, moitos deles cando apenas levaban dúas horas de apertura.
Como en cada edición, premiouse a ristra máis longa, que neste caso alcanzou os 60,70 metros realizada por Feliciano Pombo, e a cebola máis grande, de 1.720 gramos, cultivada por Esteban Miniño en Bordóns.
En canto ás composicións artísticas, unha vez máis quedou patente o talento. As premiadas foron a Torre de Hércules, A Noiva da Cebola e o Veleiro Bribón.
Aproveitando esta cita festiva, Sanxenxo tamén entregou as súas tradicionais Cebolas de Ouro que, nesta ocasión, foron para o enxeñeiro aeroespacial, Fernando Abilleira, traballador da NASA, e para a médica Adriana Nieva.
O alcalde, Telmo Martín, destacou que ambos comparten "traxectorias vitais similares marcadas polo esforzo, o traballo e determinación que os levaron a ter éxitos profesionais e destacar nas súas carreiras".
Abilleira agradeceu o premio e asegurou sentirse "cidadán do mundo e moi orgulloso" das súas raíces galegas e de Sanxenxo, dedicándolle o premio á súa familia e agradecendo "agarimo que estou a recibir de todos vós".
A filla de Adriana Nieva, pola súa banda, agradeceu a distinción á súa nai e lembrou que a súa profesión "sempre foi unha das súas prioridades", aínda que tamén destacou o seu papel "como nai, esposa e médica", visiblemente emocionada.
Unha das novidades desta edición da Feira da Cebola, o taller para nenos, tivo un gran éxito de participación. Unhas expertas "ceboleiras" encargáronse de mostrar aos máis pequenos a elaboración das ristras e as composicións artísticas.
Ante a previsión de condicións meteorolóxicas adversas, decidiuse aprazar o espectáculo pirotécnico previsto para hoxe a mañá martes á mesma hora.
Tamén se traslada, pero ao mércores, a verbena prevista para esta noite con La Oca Banda e New York.