O Banco de Alimentos de Vigo e Pontevedra permanecerá aberto, polo menos, ata este mércores 18 de marzo para atender "as necesidades urxentes de varias ONG", aínda que o farán extremando as precaucións polo Covid-19.
"Somos o supermercado das persoas máis necesitadas e, garantindo sempre as medidas de prevención, imos desempeñar o labor humanitario, polo menos ata o mércores", argumenta o presidente da fundación, Pedro Pereira.
O que si fixo o Banco de Alimentos é rebaixar a súa actividade e establecer medidas de seguridade para a recollida de comida nos seus dous almacéns.
Así, os voluntarios de maior idade non poden desempeñar o seu labor por pertencer a un grupo de risco, e faino no seu lugar o persoal máis novo.
Entre as normas esixidas ás entidades receptoras de comida atópase o respecto da distancia estipulada para evitar calquera aglomeración.
Ademais aprazáronse as próximas recollidas solidarias de alimentos enmarcadas dentro da Operación Quilo.