Lucía Santos, portavoz municipal do BNG de Marín, mostra a súa preocupación polo atraso na creación dunha área para autocaravanas no municipio. A representante nacionalista afirma que esta modalidade de turismo aumentou exponencialmente durante os últimos anos incrementándose como consecuencia da pandemia ata o punto de que a demanda de alugueiro destes vehículos supera a oferta existente.
Lembra que, en febreiro de 2020, o BNG presentaba unha moción no pleno solicitando a creación dun espazo para o estacionamento de autocaravanas, que foi aprobada por unanimidade, coa idea de dotar a Marín deste servizo demandado para potenciar o sector turístico, "xerando unha importante fonte de ingresos na economía local".
Pero o atraso de máis de dous anos leva a que Lucía Santos lamente a falta de execución do acordo plenario e considera que se trata dunha "mostra máis do deixamento e falta de xestión que vén mostrando o goberno de María Ramallo". Expón que a falta dun espazo para autocaravanas está a crear problemas cun "asentamento ilegal" na contorna de Portocelo.
A representante do BNG indica que Marín conta con recursos espectaculares que deben ser postos en valor e demanda a dotación de servizos para fomentar o turismo sostible. Acusa o goberno do PP de mostrar falta de ideas e de interese para implementar medidas que dinamicen social e economicamente o municipio.