O BNG levou ao Parlamento a situación de "precariedade" na que están a realizar o seu traballo os profesionais do IES Illa de Tambo en vésperas do inicio de curso escolar, literalmente con mesas na rúa, debido a unhas obras que se están a realizar no centro por parte da Consellería de Educación.
A deputada do Bloque Montse Prado, autora da iniciativa rexistrada este martes na Cámara, presentou unha batería de iniciativas parlamentarias para que o goberno da Xunta tome as medidas precisas para que a "falta de planificación na realización das obras" do IES Illa de Tambo non signifique ningún prexuízo para a comunidade educativa e garanta o inicio do curso escolar con normalidade para o alumnado.
O pasado 10 de maio, Educación e Ordenación Universitaria licitou unhas obras de rehabilitación integral do centro que consisten en melloras na eficiencia enerxética, renovación dunha sala de caldeira de biomasa, illamento da fachada, cuberta do ximnasio e substitución de fiestras.