A finais da próxima semana, os catro partidos da oposición -Partido Popular, PSdeG-PSOE, Marea e Ciudadanos- esperan ter terminado un primeiro borrador do regulamento de participación cidadá, un dos primeiros documentos que entenden son necesarios para cambiar as "regras do xogo" da corporación municipal.
Así o avanzaron Jacobo Moreira, Agustín Fernández, Luís Rei e María Rei que, a instancias desta última, reuníronse este venres en dependencias municipais para avanzar no contido deste regulamento de participación.
Segundo sinalaron a PontevedraViva ao remate deste encontro, entre os dous documentos sobre os que se están traballando inicialmente, un redactado polos socialistas e outro por Marea, hai unha coincidencia "moi elevada", polo que ambos os textos de refundirán nun só, incluíndo as propostas que presenten nos próximos días tanto o Partido Popular como Ciudadanos.
A intención da oposición, que unha vez máis se reuniu coa ausencia do BNG, é remitir este borrador ás forzas vivas da cidade para que poidan facer tamén as súas achegas ao documento que prevén presentar.
Ademais, tamén se convocará unha reunión á que se convidará non só ás asociacións de veciños, senón tamén aos colectivos empresariais, sindicatos e entidades de relevancia social para presentarlles persoalmente este proxecto de regulamento de participación cidadá e recoller as suxestións e ideas que desexen incorporar ao mesmo.