A falta de persoal nos centros de saúde no Concello de Vilaboa levou a que o BNG local convoque unha concentración de protesta para este martes 13 de outubro ás 20.00 horas diante o consultorio médico do Toural.
Con esta protesta queren reclamar ao SERGAS e á Xunta de Galicia persoal suficiente para o Centro de Saúde do municipio e esixir a reapertura inmediata do servizo de atención primaria no consultorio de Santa Cristina de Cobres con persoal propio.
Ao mesmo tempo, demandan que desde a Xunta cese o desmantelamento nos servizos sanitarios da área sanitaria de Pontevedra e que deixe de empregarse a atención telefónica como medida prioritaria para consultar aos pacientes. Ademais piden que se cubran as baixas e vacacións do persoal sanitario para garantir unha atención de calidade.
Sinalan que se presentaron dúas mocións nos plenos da corporación de Vilaboa sen que a Xunta fixese caso ás demandas da cidadanía dun Concello que conta con medidas restritivas polas repuntas de covid-19 aparecidas neste municipio.