Os representantes do comité de empresa de Elnosa en Pontevedra entenden que o tempo se lles bota encima e por iso anunciaron que se reunirán coa conselleira de Medio Ambiente, Beatriz Mato e co conselleiro de Industria, Francisco Conde, co obxectivo de lograr que a Xunta de Galicia ditamine un plan de supramunicipalidade que sirva para superar as decisións do Concello de Pontevedra e, desta forma, a factoría poida manterse na súa actual localización en Lourizán.
O presidente do comité de empresa, Avelino García, acompañado polos representantes de Comisións Obreiras, Víctor Ledo e José Luis García Pedrosa, secretario xeral de CCOO-Industria e secretario comarcal da organización, manifestaron este mércores 17 a súa preocupación ante a decisión do Concello de Pontevedra de non admitir a trámite o Plan especial de reforma interior (PERI) para esa zona que presentara a empresa, tal e como se lle solicitou tanto desde a administración autonómica como desde a local.
A pesar de que a dirección de Elnosa pode recorrer aínda esta decisión, segundo indicou a concelleira Carme da Silva, os representantes dos traballadores entenden que non contan con tempo suficiente porque o prazo da permanencia en Lourizán finaliza en 2018.
Ante esta situación manterán as entrevistas cos conselleiros da Xunta para reclamar a súa intervención e unha solución que entenden só pode pasar pola decisión de declarar a supramunicipalidade deste tema. Anuncian que reforzarán a súa campaña de actos de protesta para defender o centenar de postos de traballo, directos e indirectos, que segundo Comisións Obreiras dependen desta industria en Pontevedra. "Imos vender cara a pel", alertou Víctor Ledo para anunciar que realizasen protestas durante os actos da campaña electoral autonómica.
Engade Pontevedra Viva como fonte preferida de Google de balde
Mantente informado coas últimas noticias de actualidade.