A Área Sanitaria de Pontevedra e O Salnés foi galardoada este martes nos premios nacionais 'Best In Class 2023', que convocan anualmente a Cátedra de Innovación e Xestión Sanitaria da Universidad Rey Juan Carlos e a publicación especializada Gaceta Médica.
Na gala celebrada no hospital La Fe de Valencia o Complexo Hospitalario Universitario de Pontevedra foi recoñecido como Mellor Hospital de Alta Complexidade, superando outros sete hospitais universitarios españois de prestixio: o Complexo Hospitalario Universitario de Santiago; os madrileños Gregorio Marañón, Clínico San Carlos e a Fundación Jiménez Díaz; o Hospital La Fe de Valencia; o Hospital de Cruces, en Barakaldo (Guipúscoa); e o Marqués de Valdecilla de Santander.
Tamén, por segundo ano consecutivo, premiouse a área sanitaria como á Mellor Organización Integrada de Atención Primaria, galardón no que se pon en valor a actividade realizada nos centros de saúde en distintas liñas de traballo como a mellora da calidade, a innovación ou as iniciativas en investigación.
Ademais o complexo hospitalario figuraba entre os finalistas a sete categorías no apartado de Mellor Especialidade, cos servizos de Anestesia e Reanimación, Dermatoloxía, Farmacia, Farmacia Hospitalaria en IMIDS (enfermidades inflamatorias inmunomediadas), Farmacia Hospitalaria en Oncoloxía, Microbioloxía e Patoloxía Dixestiva.
Os galardóns foron recollidos polo xerente da área Sanitaria de Pontevedra e O Salnés, José Flores, encabezando unha delegación composta por varios membros do equipo directivo: a directora Asistencial, Susana Romero; a directora de Atención Hospitalaria, Yolanda Sanduende; a directora de Atención Primaria, Marta Ocampo; o subdirector de Humanización, Calidade e Atención á Cidadanía, Jorge García-Borregón; a subdirectora médica de Prestación Farmacéutica, Nuria Iglesias; e a subdirectora de Enfermería, Ana García.