O alcalde de Ponte Caldelas culpa ao anterior goberno local dunha reclamación xudicial contra o Concello pola que terá que pagar 3.600 euros. "Cinco anos despois seguen chegando reclamacións xudiciais das manobras ilegais que facía o anterior alcalde" afirman desde o executivo que encabeza Andrés Díaz.
Esta última indemnización débese, explican desde o Concello, a unha apropiación indebida á beira da depuradora na que se botou formigón nun terreo particular sen cesión nin expropiación para dar un segundo acceso á instalación. "Fixérono polas bravas e ao propietario da finca non lle quedou outra que acudir ao Xulgado", critican desde o gabinete de Díaz.
Despois da resolución o Concello chegou a un acordo co denunciante para evitar o litixio "que incrementaría bastante ou custo a pagar e terían que sentar na bancada ao anterior alcalde e ao seu tenente de alcalde, responsables destas obras ilegais", asegura o rexedor socialista, Andrés Díaz.