As expropiacións de Pasarón chegarán aos xulgados. O Concello de Pontevedra non está conforme coa resolución do Xurado de Expropiacións de Galicia sobre o valor dos terreos que houbo que ocupar para a construción do novo campo de fútbol.
A Xunta de Goberno aprobou presentar un recurso contencioso administrativo contra esta taxación do organismo autonómico, que valorou as once parcelas nun total de 1,9 millóns euros, 600.000 máis dos que fixara o Concello de Pontevedra.
Segundo explicou Agustín Fernández, que este luns actuou como voceiro do goberno municipal, a diferenza entre ambas as dúas cantidades débese a que para realizar esta taxación o Xurado de Expropiacións de Galicia aplica o relatorio de valores do ano 2011, cando debería, segundo a interpretación do Concello, utilizar a de 2005, ano no que se iniciou este proceso expropiatorio.
As parcelas expropiadas suman máis de 4.000 metros cadrados e estaban situadas entre o campo de fútbol e a avenida da Coruña.