"Non é a mellor opción pero é a única viable", nestes termos referiuse este luns o concelleiro de Infraestruturas, César Mosquera ao trazado da variante de Alba proposto pola Xunta.
Moquera informou en rolda de prensa das alegacións que vai presentar o Concello de Pontevedra a este proxecto e nas que pide que "se suavice e se adapte ao territorio", para incluír os fluxos peonís e de ciclistas, xa que agora está deseñado coma "un vial duro".
A xunta de goberno local aprobou este luns os informes do estudo de trazado e de impacto ambiental, para darlles traslado á Consellería de Medio Ambiente, Territorio e Vivenda.
Os departamentos municipais de Arquitectura, Arqueoloxía, Enxeñería e Medio Ambiente Natural sinalan unha serie de cuestións que deben corrixirse neste proxecto e que, ademais dos fluxos peonís e ciclistas, atenden ás conexións cos viais existentes, piden corrixir o forte impacto do trazado na contorna do CEIP Campañó, ou á contaminación acústica nos núcleos de poboación.
Os técnicos tamén recomendan "prever, dentro da zona de posible ampliación da estrada, a implantación dun itinerario pavimentado, paralelo á variante, dotado de iluminación pública e adaptado a eses usos".
Mosquera considera que a actual proposta de trazado é a única viable, ante a negativa do Ministerio de Fomento de permitir a ligazón coa N-550 na proposta inicial (alternativa 1) por ser un punto demasiado distante da cidade.
Engade Pontevedra Viva como fonte preferida de Google de balde
Mantente informado coas últimas noticias de actualidade.