O alcalde do Concello de Cerdedo-Cotobade, Jorge Cubela, e o concelleiro Bruno Portela, achegáronse ata a área de descanso do entorno da fonte Sobreira para comprobar os traballos de recuperación e saneamento levados a cabo polos operarios municipais.
Pendentes da instalación dunha mesa e uns bancos de pedra, a intención do Concello é deixar habilitado este espazo como zona ao servizo da veciñanza, sobre todo a xente maior, que aproveita o lugar para facer os seus descansos despois de percorrer a distancia que separa aos núcleos de poboación de Borela e A Graña, comunicados por esta estrada de titularidade provincial.
Os traballos acometidos polos operarios municipais consistiron básicamente na roza e eliminación de especies invasoras, construción de arquetas e aseguramento do caudal para un mellor aproveitamento da auga e dotar ao espazo de formigón impreso en color.
Segundo manifestou o alcalde Jorge Cubela, "foi unha petición veciñal que atendimos de boa gana porque esta fonte se atopa nun lugar moi transitado polos veciños que se dirixen desde Borela á Graña e viceversa e porque a propia fonte ten un encanto e unha apariencia que precisaba ser conservada e posta en valor".
Pola súa banda, o concelleiro Bruno Portela lembrou que "esta fonte está moi unida á veciñanza e todo o mundo fala dela con certa emotividade porque é unha fonte que sempre dá auga e incluso non seca no verán cando as temperaturas son máis extremas. A xente lembra como se lle daba uso como bebedoiro para as vacas que pastaban nas fincas próximas".
Engade Pontevedra Viva como fonte preferida de Google de balde
Mantente informado coas últimas noticias de actualidade.