O Concello de Pontevedra recolleu este xoves as suxestións e impresións de veciños e comerciantes de Loureiro Crespo e do Castañal, sobre a reforma da rúa que lles presentou o concelleiro de Obras, Demetrio Gómez e que tivo, segundo informan, unha "boa acollida".
O Concello estaba á espera de manter este encontro veciñal para enviar o proxecto a contratación coa previsión de que esta actuación poida estar en obras a final de ano.
O concelleiro Demetrio Gómez asegurou que a reunión se celebrou "nun ton moi cordial e colaborador", e recolleu as peticións formuladas polos asistentes, que "se amosaron satisfeitos coas melloras que incluirá o proxecto inicial".
As melloras inclúen a reforma das rúas do barrio do Castañal: Ernesto Caballero, Forcarei, Amor Ruibal, Mestre Soutullo e Ramón Cabanillas.
O proxecto terá un custe total de 2,5 millóns de euros, cuxo valor ascenderá aos 2,9 millóns incluíndo as melloras.