O neto do fundador da Banda de Música Popular de Marín, Ricardo Sampablo, foi recibido este venres pola alcaldesa María Ramallo uns días despois da homenaxe que a sociedade marinense rendeu ás vítimas do tráxico accidente que sufriu esta formación musical fai setenta anos.
Acompañado pola súa muller, Ana Isabel Villena, Sampablo viaxou desde Madrid á vila mariñeira, cidade natal do seu avó, para mostrar o seu agradecemento polo emotivo recordo á figura do seu avó que tivo lugar o pasado 20 de outubro.
"Foi un evento moi especial, cheo dunha gran xenerosidade", díxolle ao presidente da asociación Xornadas-Reencontros coa Historia de Marín, Angel Gargía Carragal; e á rexedora marinense.
A pesar de que Ricardo Sampablo non puido coñecer ao seu avó, si que herdou del a súa paixón pola música. Queta Molas, membro da asociación promotora da homenaxe, lembrou como o seu pai, director da banda durante uns anos despois daquel accidente, gardaba "un moi bo recordo, tanto como persoa coma músico".
Pola súa banda, Ramallo agradeceu a visita do matrimonio e tamén o labor dos organizadores por "facer posible unha homenaxe tan sentida e coidado".