O Parlamento de Galicia aprobou este mercores en comisión unha proposición non de lei do grupo socialista para reclamarlle á Xunta que resolva no primeiro semestre de 2017 os problemas coas aplicacións informáticas nas videoconferencias e no sistema de gravación de xuízos na Audiencia de Pontevedra.
A deputada socialista Patricia Vilán advertiu que este problema chega a afectar á resolución de procesos xudiciais e alertou de que a Sección Segunda da Audiencia de Pontevedra ten actualmente dúas sentenzas pendentes de se ditar "por non poder gravar ningunha parte dos xuízos correspondentes".
Lembra que a resposta pasa por implementar un sistema máis avanzado que o actual, pero "falla vontade política e orzamento".
Na propia Audiencia de Pontevedra o pasado 23 de febreiro deixou de gravar a seis testemuñas dun xuízo por lesións, cun preso en situación de prisión provisional, que "aí segue porque a sentenza está sen poñer logo de que quedaran sen audio nin vídeo sobre o acontecido na sala". O mesmo sucede cun xuízo por un delito de estafa, que se perdeu na súa totalidade e "a sentenza está sen poñer".
O problema, explicou, esténdese a outras salas de Galicia.