A Asociación Down Pontevedra "Xuntos" pon en marcha a celebración da súa tradicional gala benéfica, que nesta ocasión alcanza xa a edición número 20. O espectáculo celebrarase o vindeiro mércores 4 de xaneiro ás 20:30 horas, no Pazo da Cultura.
As entradas anticipadas poden adquirirse na Perfumería Tito de la Peña na rúa da Oliva, ou no local da asociación situado na rúa Rouco número 1- 2º piso. En horas previas tamén se poderán adquirir nos despachos de billetes do propio auditorio. O prezo é de 8 euros para os adultos e de 5 euros para os nenos menores de 12 anos.
Baixo a dirección do cantante Ángel Barry, o evento converteuse nunha das iniciativas insignia que a asociación leva a cabo para recadar fondos destinados a financiar e potenciar o Servizo de Promoción de Autonomía Persoal que comprende áreas de traballo como a Atención Temperá, Inclusión Educativa, Formación e Emprego, Vida Adulta e Independente, Área Complementaria (Expresión Corporal, Novas Tecnoloxías e de Lecer), e Área Transversal (Programa de Familias e programas de sensibilización).
Este ano a gala tamén servirá para paliar os gastos orixinados con motivo da adquisición dun novo local para a asociación.
Ademais dos artistas habituais, como é o caso do transformista e humorista Cristian, tamén actuará o grupo de teatro Axóuxere (integrado por usuarios da asociación), que nesta ocasión interpretarán un fragmento da obra "Alicia" e por suposto, a Orquestra Pontevedra con Ángel Barry á cabeza. "Sen a súa colaboración non sería posible a realización de tal evento" destacan desde Xuntos Pontevedra.
O cartel complétase coas actuacións do cantante Iker Rodríguez, o humorista Perico Rober, a cantante gaditana Lúa María, a cantante venezolana Mary Carmen Chirinos "A muller de chocolate" e do mozo da asociación Óscar Viñas realizando interpretacións coa súa bombardino. A gala completarase coas actuacións dalgúns de participantes galegos da última edición de La Voz, emitida recentemente por Telecinco, como son Jeffrey Pop e Lauriska; e os bailaríns brasileiros Luiciña e Jeanet.