A Corporación Municipal do Concello de Cerdedo-Cotobade aprobou varios regulamentos e ordenanzas entre os que destacan o que rexirá o funcionamento do albergue de peregrinos da Vía Mariana e do Camiño de Taverneiro, así como a referida ao uso dos locais de titularidade municipal.
Así, deste xeito os colectivos sociais e os veciños disporán dunha normativa clara que permita favorecer o uso e disfrute das instalacións municipais dun xeito ordenado por parte dos usuarios atendendo a unhas normas de obrigado cumprimento.
O Pleno deu tamén o visto bo á ordenaza reguladora do servizo de saneamento e depuración así como a outra de conservación das vías públicas en relación coas operacións de corta, saca, depósito e transporte de madeira e do aproveitamento de subprodutos forestais, moi demanda pola veciñanza e que vén a dar resposta aos problemas que se están a xerar pola acción dos madeireiros.
Ademais, a Corporación ratificou o Convenio de Homologación do Centro Cultural de Tenorio e lle deu luz verde ao de cooperación entre os concellos de Fornelos de Montes, A Lama e Cerdedo-Cotobade para a licitación conxunta do servizo de xestión do punto limpo ubicado no polígono industrial de Racelo, na Lama.
Por outra banda, o Pleno acordou a desafección parcial do Camiño da Grota para facilitar a súa permuta e deu autorización para asinar un convenio con Abanca para a cesión dun espazo para a instalación dun caixeiro automático.
Asemade, o alcalde Jorge Cubela deu conta das resolucións adoptadas pola Alcaldía e facilitou o informe de Tesourería co periodo medio de pagamento do primeiro trimestre do ano en curso.