O pleno da Deputación de Pontevedra aprobou o expediente para a contratación, mediante procedemento aberto, do servizo de conservación da súa rede viaria, que supón un cambio no modelo que ata agora viña aplicando.
O deputado responsable do servizo de Mobilidade, Uxío Benítez, presentou esta proposta "que vai supoñer un importante aforro para esta casa".
Segundo precisou o deputado nacionalista, ata agora a Deputación levaba a cabo o mantemento das estradas a través das brigadas e o parque de maquinaria, pero tamén contratando individualmente distintas obras ou actuacións "con contratos que non estaban ben dimensionados e non eran operativos" e que, segundo apuntou, dificultaban a planificación dos traballos.
A proposta aprobada pola administración provincial, cos votos do Partido Socialista e o BNG, expón unha división territorial da provincia en tres zonas: norte, centro e sur. As obras externas executaranse mediante un único contrato administrativo por un orzamento anual de 3,9 millóns de euros e cunha duración de catro exercicios, o que implica un investimento de preto de dezaseis millóns ata o 2021.
O que se aprobou no pleno foi o novo contrato que inclúe unha serie de actuacións programadas, como a realización de dúas campañas de rozas ao ano ou o repintado de marcas viarias cada catro.
O portavoz do grupo provincial do Partido Popular, Ángel Moldes, criticou que este contrato supón unha "privatización" dos servizos do Parque de Maquinaria un aspecto que negou o deputado Uxío Benítez quen asegurou que "seguirán facendo, igual que ata agora, pequenas actuacións de mellora" ademais de atención ás emerxencias.
"Herdamos un parque de maquinaria arbitrario, estamos a reordenalo", defendeu o portavoz socialista David Regades. Tamén apuntou que no goberno provincial "respectamos a todos os funcionarios" e adiantou que "estamos a facer todos os estudos para buscar un novo emprazamento" para a sede do parque que agora ocupa unha concesión de costas en terreos protexidos da Xunqueira de Alba, en Pontevedra.
Os deputados do PP votaron en contra da proposta e o deputado da coalición Son-Marea abstívose.
A presidenta da Deputación, Carmela Silva, participou no debate para lamentar as declaracións dos representantes comarcais do sindicato Comisións Obreiras, José Ramón Piñeiro e José Luis García Pedrosa, nas que cualificaron de "sinvergüenzas políticos" a Carmela Silva e ao vicepresidente César Mosquera por ser "traidores á causa da esquerda política de Galicia" ao presentar esta reorganización do servizo de mobilidade.
Carmela Silva defendeu a "transparencia, equidade, cumprimento da legalidade" e o tratamento igualitario que supoñerá o novo sistema hoxe aprobado "en contra do que ocorría antes".