O Partido Popular recolleu a luva lanzada polos veciños de Mollabao aos partidos que compoñen a corporación municipal e levará ao pleno a moción presentada pola veciñanza na que reclaman o inicio das obras de reforma integral do barrio.
Así o confirmou este domingo o portavoz do PP local, Rafa Domínguez, quen considera necesario que o goberno local "atenda esta demanda histórica".
"Urxe trasladar o modelo urbano aos nosos barrios e por iso comprometémosnos desde un primeiro momento cos veciños de Mollabao a levar este asunto ao Pleno Municipal", argumentou Domínguez.
O PP levará desta forma o texto da moción veciñal á Xunta de Portavoces que se celebrará o vindeiro martes 11 de decembro no Concello de Pontevedra.
"Tras analizar o orzamento municipal para o próximo ano 2019, comprobamos como Lores volve fallar aos veciños de Mollabao", insistiu o representante popular convidando o resto de grupos municipais a sumarse a esta proposta.