O Partido Popular de Ponte Caldelas emitiu un comunicado co que quixo saír ao paso de ultímalas afirmacións realizadas polo alcalde, Andrés Díaz sobre a suposta mala situación económica do Concello.
Os populares aseguran que "o único que pretende Andrés Díaz difundindo estas mentiras é cuestionar o legado do anterior alcalde e o seu equipo de goberno e xustificar a súa incompetencia para xestionar o concello e levar a cabo investimentos, utilizando a escusa de que non hai diñeiro, o cal non é certo"
Citando os datos incluídos na Conta Xeral correspondente ao ano 2014 elaborada pola interventora municipal, o PP caldelano sinala que a situación de endebedamento dun concello mídese pola porcentaxe do que se coñece como "débeda viva", é dicir, a relación entre os préstamos totais que ten ese Concello en relación aos seus recursos ordinarios de acordo ao seu orzamento municipal.
Así o Concello de Ponte Caldelas ten un nivel de endebedamento do 30% aproximadamente, moi por baixo do que permite o Ministerio de Facenda do 75% (antes do 2011 permitíase ata o 110%).
Recoñecen que o Concello de Ponte Caldelas ten préstamos a longo prazo que suman un total de 612.000 euros, concertados a maioría deles coa caixa de anticipos da Deputación que son sen intereses, e outros co Banco de Crédito Local.
O orzamento municipal era de 3.215.381 euros en 2015.