O voceiro do grupo provincial do PP, Ángel Moldes, e José Iglesias, vicepresidente da Asociación Galega de Técnicos de Emerxencias Sanitarias, pediron ao goberno da Deputación que escoite as demandas desta asociación sobre os lombos.
Na rolda de prensa aclararon que "non están en contra de medidas de calmado de tráfico", senón dos resaltos, os lombos, que consideran unhas medidas "moi agresivas", porque "castigan a quen cumpre e a quen incumpre", e de forma especial aos seus pacientes nos traslados aos centros hospitalarios.
Segundo expuxeron, a nivel provincial prexudican a 31 unidades asistenciais e 4 medicalizadas, que fan máis de cen mil traslados urxentes ao ano. Si suman os traslados non urxentes, pasan de 200.000 traslados sanitarios, aseguraron.
Ángel Moldes lamentou que nos decálogos e na guía básica de espazos públicos e mobilidade amable que recentemente presentou a Deputación de Pontevedra "non se teña en conta a experiencia de distintos sectores que teñen moito que aportar", como esta asociación.