O PP de Pontevedra insistiu este luns nas súas críticas ao proxecto de orzamento municipal para 2022 aprobado en pleno o pasado venres. O presidente dos 'populares' pontevedreses,Rafa Domínguez, urxiu nesta ocasión ao Concello a corrixir a "mala estruturación" que ve nas contas.
Así, insiste en trátase duns orzamentos "feitos con improvisación" e que non cumpren cos requisitos básicos que recolle a Lei de Estabilidade Orzamentaria. Esta afirmación xa a realizou Domínguez durante a sesión plenaria e o portavoz de Facenda, Raimundo González, respondeulle que as regras fiscais do Estado están en suspenso.
Para Rafa Domínguez, este incumprimento "pon en risco as contas municipais" e, ademais, o Concello pasaría, por segundo ano consecutivo, a estar tutelado por unha administración superior.
En concreto, asegura que "de non actuar axilmente", sería o segundo ano consecutivo no que o Concello pasaría a estar tutelado pola Xunta de Galicia, que á súa vez terá que remitir toda a información derivada deste tutelaje ao Ministerio de Facenda, que tamén exercerá de guía. Segundo alerta o líder do PP, esta situación implicará atrasos en calquera toma de decisión que afecte o noso Orzamento.
Rafa Domínguez tamén denuncia que no caso de que o Concello non leve a cabo "estes axustes nas súas contas", o Organismo local deberá elaborar un plan económico financeiro para cumprir coa norma.
A portavoz do Goberno local, Anabel Gulías, tamén respondeu este luns ao PP. Ademais de lembrar a resposta do seu compañeiros de goberno, Raimundo González, tamén criticou que o PP "cando non ten alternativa e non ten propostas ten a costume de buscar sempre triquiñuelas para impedir que teñamos novos orzamentos".
Así, lembra que no propio pleno remitírono aos informes de Intervención que avalan este orzamento e que no caso da Lei de Estabilidade Orzamentaria "é unha cuestión técnica que non ten efecto sobre os orzamentos".