O grupo provincial do Partido Popular lamentaba este venres que o goberno bipartito da Deputación "censurase" unha das mocións que os populares presentaran para o pleno que se celebrará o vindeiro luns 29 de maio. A moción, que foi rexeitada, reclamaba explicacións da presidenta da Deputación, Carmela Silva, sobre un presunto enchufe da súa cuñada no Concello de Vigo.
Os populares, a través de Ángel Moldes, Elena Muñoz e Luisa Piñiero, lamentan que a presidenta provincial se escude tras os informes xurídicos para evitar dar explicacións sobre este caso.
Ante esta decisión consideran que se está censurando desde o goberno provincial para evitar ofrecer explicacións políticas. Os populares acusan tanto os socialistas como aos socios de goberno do BNG por facer seguidismo e ser cómplices do que consideran "un paso de xigante cara atrás" en termos democráticos.
Esperan que a presidenta reflexione durante esta fin de semana para que o luns decida dar resposta á moción.
Ángel Moldes tamén criticou que, durante o mandato de Carmela Silva, a presidenta provincial teña moita presenza en Vigo e pouca no resto da provincia. E lamentou que a execución de infraestruturas e de eventos estea paralizada. Tamén considera negativo que o goberno da Deputación colaborase "a destruír a alcaldía de Sanxenxo".