Silvia Junco, concelleira do Partido Popular de Pontevedra e responsable de Benestar Social mantiña un encontro, acompañada do presidente do PP local Rafa Domínguez con representantes das asociacións Alcer (Asociación para a Loita Contra as Enfermidades do Ril), Afapo (Asociación de familiares de enfermos de Alzheimer), Asem (Asociación Galega contra as Enfermidades Neuromusculares) e Adahpo (Asociación Déficit Atención Hiperactividade Pontevedra).
Durante este encontro, os populares presentaron a súa proposta para colaborar con estes colectivos adaptándose á actual situación de crise. Silvia Junco explicoulles que a intención do PP pasa porque se reforce o número de persoas que traballan na área de Servizos Sociais no Concello; crear unha rede de voluntariado e duplicar, como mínimo, a partida orzamentaria de axuda de emerxencia social.
Todas estas accións contémplanse no Plan de Compromiso Social que o PP está a elaborar coa intención de que o goberno local destine o 10% do orzamento do ano 2021 en gasto social, ao entender que é insuficiente o actual 4,5%.
Rafa Domínguez comunicou a estes integrantes dos colectivos de axuda a pacientes que a súa formación apoiará o Orzamento municipal para o próximo ano se nas contas se inclúe, entre outras cuestións, o aumento de investimento en Benestar Social. Afirma que a proposta se ha elaborado tras manter un diálogo continuo con colectivos afectados.
O PP é partidario da concesión de axudas a asociacións que desenvolvan actividades de utilidade pública e de interese social. Junco tamén explicou que é necesario que o goberno que lidera Fernández Lores realice un plan de continxencia para financiar aqueles gastos derivados da pandemia entre os colectivos sociais e dedicarlle unha especial atención aos que atenden a persoas dependentes ou con mobilidade reducida.