O PSOE ve "sectarismo" na xestión de Portos de Galicia para as dársenas de Raxó e Covelo

Poio
10 de outubro 2017

O portavoz de Pesca do grupo socialista no Parlamento de Galicia, Julio Torrado, denunciou este martes que o organismo público bloquea o acondicionamento dos portos de Covelo e Raxó, os dous en Poio, pendentes desde o ano 2009

Porto e núcleo de vivendas en Raxó (Poio)
Porto e núcleo de vivendas en Raxó (Poio) / Mónica Patxot

O portavoz de Pesca do grupo socialista no Parlamento de Galicia, Julio Torrado, denunciou este martes que o organismo público Portos de Galicia actúa cun "sectarismo inaceptable" ao bloquear o acondicionamento dos portos de Covelo e Raxó, os dous en Poio, pendentes desde o ano 2009.

O socialista referiuse ao veto do PP a unha proposta socialista para poñer en marcha os proxectos pendentes, que rexeitou con argumentos "incoherentes, falaces e pobres". Na súa opinión, Portos buscou "escusas de mal pagador" para "mal disimular" o seu "traballo como zapadores do exército".

Torrado critica que "segundo o PP non hai ningún problema técnico nin tampouco político" e desafiou ao partido no goberno a facer unha visita ao porto para comprobar se, como dixo no Parlamento a portavoz 'popular', as obras están sendo executadas.

O parlamentario do PSdeG-PSOE opina que a paralización responde a unha decisión "meramente política", logo de constatar o acordo asinado en 2009 entre o Concello e Portos, que mesmo foi orzamentado nos anos 2009, 2010 e 2011, sen que chegara a ser executado. Dende aquela, "permanecen mudos, pese a que os proxectos ata contan coa autorización do servizo provincial de Costas do Estado".