O resultado das eleccións xerais do 23 de xullo mantense na provincia de Pontevedra tras o reconto este venres do voto CERA, de cidadáns residentes no estranxeiro.
Co escrutinio do 23X parecía imposible que se movese algún escano na provincia. O último deputado asignado correspondía ao Partido Socialista, en disputa cun BNG que quedou a 5.821 votos de arrebatarllo.
No que respecta ao voto CERA, contabilizáronse un total de 9.839 votos, sendo 148 deles nulos e 99 en branco.
Do resto, a forza que contou con máis apoios foi o Partido Popular, con 4.319 votos e case dobrando ao Partido Socialista, que sumou 2.345 votos.
En canto ao resto de formacións, Sumar conseguiu 1.019 apoios, Vox 865, o Bloque Nacionalista Galego 603, Pacma 290, a Frente Obrero 77, o Partido Comunista dos Traballadores da Galicia 43 e Recortes Cero 22.
Unhas cifras insuficientes en todo caso para mover un resultado que repartira por Pontevedra tres deputados a Partido Popular e Partido Socialista e un máis para Sumar.