No marco do Plan Galego de Atención Primaria 2020-2021, a Área Sanitaria de Pontevedra e O Salnés ven de planificar a distribución de efectivos que reforzarán os cadros de persoal da súa rede de Atención Primaria, coa cobertura de 12 novas prazas de distintas categorías profesionais asignadas a varios dispositivos asistenciais.
Destas doce: dúas son de facultativos para prestar servizo nos centros de saúde de Anafáns, no Concello de Poio, e Virxe Peregrina de Pontevedra, tamén se contempla un novo médico para o Punto de Atención Continuada (PAC) de Cambados.
Ademáis o Sergas agarda que dous novos pediatras presten asistencia nos centros de saúde de Baltar, en Sanxenxo, e A Parda en Pontevedra.
Tres novos profesionais de Enfermaría especialista Familiar e Comunitaria desenvolverán a súa labor de Atención Primaria respectivamente nos centros de saúde de San Roque en Vilagarcía de Arousa, Baltar en Sanxenxo e Anafáns en Poio.
Así mesmo, o Servizo Galego de Saúde incorporará un novo profesional de Enfermaría no Punto de Atención Continuada (PAC) de Cambados e outro novo efectivo de Enfermaría especialista en Pediatría no centro de saúde pontevedrés de A Parda.
Ademais, a Área Sanitaria de Pontevedra e O Salnés incorpora unha nova praza de Fisioterapia, que prestará servizo no centro de saúde de Vilanova de Arousa. E disporá unha nova praza de profesional de Traballo Social, que desenvolverá a súa actividade asistencial no centro de saúde de Cambados.