Tres mulleres que son referentes do deporte feminino en Poio serán as protagonistas do terceiro faladoiro virtual do programa municipal A forza das mulleres, unha iniciativa organizada pola Concellería de Igualdade e o CIM de Poio.
As deportistas convidadas a tomar parte nesta conversa son a adestradora de kick boxing Lucía Soto, a futbolista do Poio Pescamar Julia Paz e Lorena Nieto, xogadora de kayak polo.
A cita será este xoves 3 de xuño, a partir das 17.00 horas. Como xa é habitual, o faladoiro poderá seguirse a través da canle de YouTube do Concello.
O obxectivo destes encontros é dar voz ás mulleres do municipio que desempeñan a súa labor nos diferentes sectores representados no mural que a concellaría de Igualdade presentou na Seca para conmemorar o Día Internacional da Muller, que tivo lugar o pasado 8 de marzo.
Logo do éxito dos dous primeiros faladoiros, onde as protagonistas foron emprendedoras do municipio e profesionais sanitarias, agora chega a quenda do deporte, un ámbito no que, como salienta a concelleira de Igualdade, Silvia Díaz, "as mulleres tiveron que abrirse camiño e aínda a día de hoxe seguen loitando pola igualdade nas diferentes disciplinas".