O Concello de Marín informou de que o viario de praias xa está habilitado para un único sentido, prohibindo a dobre dirección naqueles puntos onde o tránsito rodado permitía movementos de ida e volta.
Ademais, todo o viario que da acceso tanto en coche como de xeito peonil ás praias servirá como escaparate dunha campaña de concienciación do Concello sobre aquelas medidas de prevención, hixiene e seguridade sanitaria que é preciso manter nestes momentos nos areais.
As mensaxes que se poderán ler nas lonas que xa están a ser colocadas apelan ao "sentidiño" e ao respecto da distancia dos dous metros, así como do uso da máscara cando non sexa posible respectar a distancia e á hixiene constante de mans.
MÁIS PREVENCIÓN NO CENTRO URBANO
Baixo o lema "Remamos xuntos", o Concello tamén está procedendo á colocación de lonas adhesivas en diversos espazos do espazo urbano, como no panel ubicado fronte á biblioteca municipal.
Nesas lonas pódense ler as mensaxes máis relevantes relativas á prevención e á redución do risco de contaxios pola COVID-19.