O CEIP Manuel Vidal Portela de Pontevedra logrou neste curso académico o selo que o certifica como Escola eTwinning, un distintivo que recoñece e valora a participación, o compromiso e a dedicación de todo o centro a este programa da Unión Europea.
O eTwinning é unha plataforma integrada no Erasmus+, o programa da Unión Europea que apoia a educación, a formación, a mocidade e o deporte. Ten como obxectivos principais fomentar e facilitar a comunicación, xerar intercambio de ideas e promover a colaboración entre docentes e estudantes de diferentes países participantes, todo iso empregando as Tecnoloxías da Información e a Comunicación (TIC).
Desde o Vidal Portela destacan que tan só catro centros galegos lograron este Selo este ano, de tal maneira que forman parte dun "selecto grupo" de centros escolares aos que se recoñece o compromiso coa educación innovadora e a colaboración internacional.
Mela Rodríguez, embaixadora eTwinning en Galicia e unha das mestras de Inglés do centro, valora que recibir o selo de Escola eTwinning "é unha gran honra para o noso centro e reflicte o esforzo e dedicación dos nosos docentes e estudantes na promoción dunha educación aberta e colaborativa".
Durante este curso 2023-2024, o CEIP Manuel Vidal Portela participa activamente no proxecto 'Arcimboldo Healthy Art', unha iniciativa que reune escolas de Alemaña, Grecia, Eslovaquia e tres centros educativos españois.
O proxecto céntrase na difusión da cultura autóctona e as tradicións locais, fomentando o intercambio cultural e a aprendizaxe colaborativa entre estudantes de diferentes países.
Este martes, participaron nunha videoconferencia cunha escola de Mégara, Grecia, na que tiveron a oportunidade de ensinar a tradición dos Maios aos seus compañeiros gregos cun taller no que crearon flores dos Maios mediante material de refugallo.