A concesionaria do servizo do saneamento e abastecemento de Sanxenxo iniciará este luns, 22 de xullo, unha obra urxente na rúa Profesor Hermida para mellorar a calidade da auga na praia da Carabuxeira.
Nun estudo realizado pola empresa, tras rexistrar anomalías nas analíticas, detectáronse filtracións nas tubaxes de formigón que poderían estar a alterar a calidade da auga do areal. Os traballos consistirán na substitución dun tramo de 160 metros de tubaxe de PVC de saneamento e 60 metros, de pluviais. Unha actuación que podería prolongarse ata dúas semanas e que ten un custo que rolda os 85.000 euros.
Durante o mes de xuño tamén se realizaron actuacións de saneamento na zona de Bordóns despois de que a concesionaria, a pedimento do Concello, realizará inspeccións tanto nas redes de saneamento como a rede de augas pluviais. Como resultado das revisións, localizouse un punto de filtración na estrada PO-308, no pozo situado nas proximidades da desembocadura do rego de Bordóns, que presentaba unha filtración desde o fondo do pozo ao rego de Bordóns. Esta filtración foi emendada de forma inmediata, mediante demolición do fondo do pozo e reconstrución do mesmo.
Tamén se localizou un punto de infiltración menor na estrada EP-9201, onde se apreciaba unha leve entrada de augas residuais á rede de augas pluviais. Da mesma maneira, procedeuse á demolición do fondo de pozo e á súa reconstrución. Durante as semanas seguintes ás reparacións realizadas, a empresa recolleu mostras da estado da auga de mar na praia de Nanín con resultados favorables.
Engade Pontevedra Viva como fonte preferida de Google de balde
Mantente informado coas últimas noticias de actualidade.