O presidente da Xunta, Alfonso Rueda, e o alcalde de Poio, Ángel Moldes, asinaron este martes un convenio de colaboración polo que se investirán 1,7 millóns de euros na primeira fase da humanización da estrada autonómica PO-308 entre a Ponte da Barca e o Casal de Ferreirós.
O 70% dos fondos serán aportados polo executivo autonómico e o 30% restante será financiado pola administración local que será a encargada de executar a obra polo que tamén asumirá o cambio de titularidade a favor do concello do dominio público viario asociado á estrada.
O acto de sinatura deste convenio celebrouse no Casal de Ferreirós na presenza dun numeroso grupo de representantes de asociación veciñais e empresariais. O presidente da Xunta estivo acompañado da conselleira de Vivenda e Planificación de Infraestruturas, María Martínez Allegue.
Os traballos acometeranse entre a Ponte da Barca e o Casal de Ferreirós e terán como principais obxectivos garantir a accesibilidade e dar prioridade ao peón.
En concreto, entre outras accións, reordenarase o espazo público coa renovación do firme e pavimentación de beirarrúas, pasos de peóns elevados; crearanse aparcadoiros, zonas de carga e descarga e estacionamento para persoas con mobilidade reducida; e instalaranse zonas axardinadas e mobiliario urbano.
A estimación é que o Concello de Poio licite as obras no primeiro trimestre deste ano para que poidan iniciarse en setembro "unha vez que pase La Vuelta ciclista a España" que disputará a súa Etapa 16 entre as localidades de Poio e Mos, tal e como recordou o alcalde. As obras prolongaranse durante aproximadamente un ano.
Na súa intervención Rueda salientou que se trata "dunha das zonas urbanas máis transitadas de Galicia, nunha posición estratéxica" ao ser a vía de entrada e saída da cidade de Pontevedra e a que canaliza o tráfico do Salnés. E lembrou que a estrada atravesa unha zona na que residen "8.000 persoas" que "teñen dereito" a que "o tráfico intenso sexa compatible cunha contorna o máis humanizada e agradable posible".
Pola súa banda, Ángel Moldes aproveitou a ocasión para pedirlle ao presidente da Xunta que a humanización desta estrada continúe "ata a gasolineira da costa de Albar". "Somos un equipo de goberno ambicioso e sempre queremos máis", dixo o alcalde.
Ángel Moldes tamén informou que o Concello ten grandes plans para este entorno "hoxe mesmo presentamos á Deputación o proxecto para a reforma dun parque" nesta contorna da parroquia de San Salvador.
Ademáis anunciou que "próximamente vamos a poder ver como distintas urbanizaciones se desarrollan" nesta zona.
Sen querer desvelar moito o alcalde indicou que trátase de tres urbanizacións de vivenda de promotoras privadas que "quedaron a medias durante a crise e que agora se retoman".
