Operación repetir como sede: "Queremos os Feroz permanentemente en Pontevedra"

"Miguel, inviste un pouquiño máis e que o ano que vén sexan tamén aquí". Non dubidou nin un segundo a actriz Candela Peña en defender a idoneidade de que os Premios Feroz, que se celebraron en 2025 e 2026 en Pontevedra, poidan volver o ano próximo.

A súa petición, dirixida ao alcalde, Miguel Anxo Fernández Lores, realizouna ao seu paso pola alfombra vermella previa á gala e recolleu o sentir unánime de invitados e presentadores desta cita co audiovisual español. A opción está descartada, pois foi un contrato por dous anos e en 2027 terá xa outra localización, pero non escatimaron en esforzos para tentar que repitan.

Candela Peña recolleu, iso si, o sentir de moitos dos asistentes á gala, que foi un cambio de datas buscando temperaturas máis agradables. "Miña nai, moito frío, moita choiva, moito de todo. Os Feroz no verán", pediu a actriz, que este último ano presentou Furias.

A intervención desta actriz na alfombra vermella confirmou que o alcalde se gañou o aplauso do sector e que a idea municipal de atraer estes premios á cidade foi ben acollida: "Miguel, o alcalde, fixo moi ben en investir un pouquiño en cultura e dixo: Eu invisto, pero vaise a facer 2 anos na miña cidade".

"Moi ben por Miguel, claro que si, porque mira que marabilla, nunha cidade 'chiquitita', todo este cancaneo de xente, o desembolso económico que deixa na cidade. Paréceme moi ben. É que está todo moi centralizado", aplaudiu a actriz.

Os catro presentadores da gala, Petra Martínez, Samantha Hudson, Elisabet Casanovas e Antonio Durán Morris, sumáronse á petición.

Samantha Hudson foi moi gráfica: "Ai, por favor! Facede o que sexa!". E, en caso de non poder logralo, lanzou ao aire a petición de volver ela mesma. "Sei que non van facer os Feroz o próximo ano aquí, pero, a min, que me traian a Pontevedra", insistiu.

Tras pasar toda a semana na cidade, caeu rendida aos seus pés. "Gustoume a paisaxe, o acougo, o brión que salgue nas pedras despois de que chova, o cheiro, ese aire tan fresco que se respira, a tranquilidade, a paz, unhas flores que me regalaron. Gustoume moito como comín, como durmín. Gustoume todo, a verdade", enumerou cun sorriso nos beizos.

Igualmente directo foi Morris, a representación galega entre os presentadores. "Queremos os Feroz permanentemente en Pontevedra", dixo, ademais de destacar que os Feroz "están totalmente implicados coa cidade e a cidade cos premios. Poderían botar aquí dez anos".

Elisabet Casanovas foise encantada tras pasar "días moi bonitos" e confirmar que "se come xenial en Pontevedra" e Petra Martínez desfíxose en eloxios cara ao "preciosa" que é a cidade, a súa "tranquilidade" e a súa "comida tan rica".

Ademais de querer saber como se vía desde a prensa local que os premios se celebren na cidade, Petra Martínez sumouse á operación 'que os Feroz sigan' pedindo: "Pido que o Feroz se faga sempre en Pontevedra. Que se faga permanentemente".

Á petición sumáronse moitos dos que pasaron pola alfombra, como a actriz galega María Castro, de La Promesa. "Feroz en Pontevedra, Feroz en Pontevedra", pediu con ritmo, tras afirmar: "Encántame vir a Pontevedra e encántame que a xente che reciba con esa ilusión e ti, dalgunha forma, tamén poderás devolvela".

Non quedou atrás o actor Álvaro Morte, nomeado por Anatomía de un instante, ao afirmar: "Si os Feroz seguen querendo facelo aquí, eu estarei encantado de vir". É, para el, "un sitio marabilloso" e defende que "a organización está a funcionar perfectamente, a contorna é incrible".

María Guerra, presidenta da Asociación de Informadores Cinematográficos de España (AICE), organizadora dos premios, non esqueceu o carácter itinerante dos Feroz, que nacen coa idea de "percorrer territorios", afirmou: "Nós estamos encantados e volveriamos mañá mesmo".

O alcalde é consciente de como a cidadanía de Pontevedra envorcouse cos Feroz e que, entre os asistentes, "está todo o mundo encantado, mesmo co tempo", e abriu a porta a esa posible repetición dos premios. "Estamos abertos a que os Feroz volvan a Pontevedra cando queiran". Mesmo chanceou: "Si non son alfombra vermella, que sexan unha alfombra amarelo, aínda que sexa".

"En Pontevedra, non desbotamos absolutamente nada, non temos teito e seguiremos traballando para pór a Pontevedra no mapa e que iso xere, como está a xerar, unha actividade económica e, sobre todo, un tema moi importante, que é a autoestima e orgullo de pertenza a un cidade que é un exemplo no mundo", indicou o alcalde.

Lores, que acudiu acompañado pola súa muller, foi tan só unha das múltiples caras da política que se pasaron pola alfombra vermella e pola gala, á que non faltaron a vicepresidenta segunda do Goberno, Yolanda Diaz; o ministro de Cultura, Ernest Urtasun; ou o conselleiro de Cultura, José López Campos.

Foi ampla a representación por parte da Deputación Provincial, coa presenza do presidente, Luís López; o vicepresidente, Rafa Domínguez; e os deputados Jorge Cubela, María Ramallo ou Javier Tourís.

Da política local, acudiron, por parte do grupo municipal do BNG, os concelleiros Anabel Gulías, Eva Vilaverde e Demetrio Gómez. Polo PP, ademais de Rafa Domínguez, os concelleiros Guillermo Juncal e Juanma Muñoz. Do PSOE, o seu portavoz, Iván Puentes, e as concelleiras Yoya Branco e Carmen Hermo, ademais da deputada Paloma Castro.