Unha semana duraron as obras de mellora na Unidade de Coidados Intensivos (UCI) do Hospital Montecelo. Este mércores 29 de abril a unidade recuperaba a súa actividade, dous días antes da data prevista.
A pesar do sorpresivo do peche temporal da UCI para realizar estes traballos en plena pandemia de Covid-19, a explicación dada desde a área sanitaria de Pontevedra e O Salnés é que, debido á baixada de ingresos dos últimos días, con só cinco pacientes críticos na UCI de Montecelo, este era un bo momento para acometer unhas obras moi necesarias.
"Dado que na actual época baixaron de forma considerable as urxencias e os accidentes de tráfico, así como as intervencións cirúrxicas, durante esta rápida reforma da UCI a área de Reanimación achega cobertura asistencial con total garantía e dispoñibilidade", informaban desde fontes da dirección do centro hospitalario.
Estes traballos consistiron na incorporación de dous boxes de illamento, de modo que se soluciona o feito de que todas as camas de atención a críticos estiveran distribuídas no mesmo espazo desa unidade, como antes das obras.
Aproveitando o peche temporal da Unidade de Coidados Intensivos "tamén se optou por pintar, renovar as luminarias e efectuar unha limpeza de condutos e instalacións, xa que hai moi poucos momentos no ano para poder executar melloras deste calado na unidade".
Pese ao descenso de casos de pacientes atendidos por coronavirus, a Unidade de Coidados Intensivos de Montecelo atópase xa operativa e preparada se se chega a producir unha segunda onda de contaxio por Covid-19.