Os alumnos do colexio Praza de Barcelos fixeron honra ao nome do centro e incorporaron o novo espazo peonalizado como patio de recreo.
Foi cunha festa, con música de gaitas, como é habitual por estas terras e con castañas e pantasmas, como é propio do tempo de Samaín.
Os primeiros en estrear o novo espazo foron os nenos de Infantil que ao mediodía tomaron a praza, logo incorporáronse o resto de alumnos. Á felicidade propia da estrea sumábase un sentimento de orgullo, xa que este día supón o resultado de dous anos de reivindicación no que se implicou toda a comunidade educativa.
Os concelleiros Carme Fouces e Luís Bará, compartiron cos rapaces e os seus profesores este día tan especial.