Os chuvascos intermitentes e a inestabilidade meteorolóxica marcarán o tempo desta semana

A alternancia de períodos de ceos moi anubrados con outros de nubes e claros será o factor principal que definirá o tempo desta semana. As temperaturas serán as normais para esta época, oscilando entre os 8 e os 16º, lixeiramente inferiores ás da semana anterior, e as chuvias estarán presentes todos os días, producíndose de xeito intermitente. 

Para o luns, como consecuencia da fronte do domingo, espéranse chuvascos illados e ocasionais en alternancia con nubes e claros, acompañados de aire frío. 

Segundo a previsión de Meteogalicia, o martes agárdase a chegada dun sistema frontal asociado a unha borrasca que pasará moi preto de Galicia e deixará ver os seus efectos especialmente na franxa atlántica. Isto provocará un aumento progresivo das nubes ao longo do día, chegando as chuvias a partir do mediodía. A borrasca irá avanzando de oeste a leste, de xeito que pola noite as precipitacións afectarán a todo o territorio autonómico, con ventos fortes soprando do sur. 

O mércores continuará na liña de inestabilidade, con influencia das baixas presións e entrada de aire frío. Espéranse chuvascos puntualmente intensos, ocasionalmente acompañados de sarabia. 

A partir do xoves continuará a influencia das borrascas, con ventos do suroeste que deixarán máis nubes e maior probabilidade de precipitación na franxa atlántica. As temperaturas manteranse entre valores similares ao resto da semana.