Os comuneiros de San Martiño de Vilaboa veñen de aprobar por unanimidade o anteproxecto para a construción do Tanatorio de Vilaboa na Asemblea Xeral da Comunidade de Montes celebrada o pasado domingo 27 de xuño.
O anteproxecto aprobado, proposto por Servicios Funerarios San Marcos, conta con dúas salas, sala de cerimonias, parque de estacionamento aberto ao público e zonas verdes. A cesión dos terreos para a súa construción será por trinta anos e están localizados ao pé do cemiterio de Vilaboa, nun espazo de preto de 4.200 metros cadrados de propiedade comunal, incluído no Plan Xeral de Ordenación Municipal (PXOM) para equipamentos.
A proposta inclúe a realización dunha parte importante da construción doutro proxecto da Comunidade de Montes de Vilaboa, a súa Casa de Montes, no lugar de Acuña.
Na mesma asemblea en que foi aprobado este anteproxecto, tamén foron tratados outros asuntos de importancia como a aprobación do novo Proxecto de Ordenación do monte para 2021-2030. O novo proxecto dá continuidade ao anterior e reafírmase na diversificación de especies e multifuncionalidade do monte apostando polo micorrizado de castiñeiro e piñeiro para a produción de cogomelos, a aposta polos castiñeiros de froito de variedades tradicionais galegas e a produción de cortiza, para complementar a explotación madeireira.