O case medio cento de concellos da provincia que están adheridos á rede Ágora, impulsada pola Deputación para mellorar os espazos públicos de Pontevedra, van implantar de xeito "inminente" a velocidade 30 nos seus núcleos urbanos.
En zonas de convivencia de coches e peóns, esta velocidade deberá reducirse a 10.
Entre os concellos nos que se aplicará esta medida, ademais de Pontevedra onde xa está en vigor, están Poio, Marín, Sanxenxo, Vilaboa, Vilagarcía, Bueu, Meis, Moraña, Cambados, Caldas de Reis, A Illa de Arousa, O Grove, Cerdedo-Cotobade, Ponte Caldelas, A Lama, Ribadumia, Meaño, Barro e Portas.
A nova sinalización viaria comezará a instalarse nos próximos días e irá acompañada de campañas de divulgación.
Uxío Benítez, responsable de Mobilidade na Deputación, subliñou que é "moi importante" que os concellos comecen a "efectivizar e visualizar de inmediato" que son "espazos a 30" e nas plataformas únicas máximo a 10.
A Rede Ágora conta con 49 concellos adheridos e ten como obxectivo implementar o espazo público para as persoas na provincia no horizonte de 2023.