En 2017, todos os impostos e taxas que cobra o Concello de Pontevedra aos cidadáns manteranse conxelados. É o terceiro ano consecutivo no que estes prezos se manteñen sen cambios. Así o avanzou hoxe o concelleiro de Facenda, Raimundo González. Trátase da primeira decisión política para a elaboración do novo orzamento municipal.
"Entendemos que a conxelación é unha boa noticia para os pontevedreses que veñen de afrontar recortes e o aumento impositivo estatal", destacou o edil do BNG, que engadiu que esta decisión supoñerá unha "pequena axuda" para os cidadáns.
Así, os 27 impostos e taxas que cobra o goberno municipal -tanto a particulares como a empresas- manterán o mesmo custo para os contribuíntes.
Esta conxelación non implica, segundo Raimundo González, que o goberno municipal renuncie a seguir co proceso de depuración e control iniciado para actualizar o padrón e evitar a fraude. Xa completada a revisión do imposto de actividades económicas (IAE) e a piques de terminar a do IBI, o censo da taxa de recollida de lixos será o seguinte en ser analizado.
"Apostamos pola eficiencia na xestión económica e por conxelar as taxas e os impostos", resumiu o responsable da facenda local, que defendeu que Pontevedra é unha das capitais de provincia cunha menor carga impositiva.
Para reforzar ese argumento, Raimundo González referiuse ao informe que elabora anualmente o concello de Madrid, onde se recolle o custo das taxas e impostos das 50 capitais de provincia máis Ceuta e Melilla. Nel, dixo, Pontevedra aparece "na parte baixa" en todos vos tributos municipais.
Neste informe tributario madrileño, referido a 2015 -o último ano publicado-, en relación ao IAE Pontevedra está no posto 34 (en orde de maior cara impositiva a menor) e no resto de impostos os datos aínda son mellor co IBI (posto 42), viñeta (posto 43), ICIO (posto 41) e o tributo de plusvalías (posto 40).
O Concello, explicou González, descarta baixar as taxas e impostos porque "nós nos facemos demagoxia" e defendeu que hai servizos que se prestan aos cidadáns que correrían perigo se se reducen os ingresos municipais por estes conceptos.
Si haberá, en todo caso, certas revisións como a que se está realizando, a instancias dunha moción presentada polo PSOE, para cobrar máis ás empresas de telefonía e telecomunicacións que operan na cidade. Raimundo González explicou que nestes momentos os técnicos municipais están a elaborar un censo das antenas e microceldas que hai no concello para dalos de alta e proceder á súa liquidación.