A Área Sanitaria de Pontevedra e O Salnés inicia a semana de Nadal con 2.481 casos activos de coronavirus, segundo confirmou este luns 20 de decembro a Consellería de Sanidade.
Esta cifra supón un incremento de 120 casos máis tras sumarse ás estatísticas nas últimas horas 221 novos contaxios e darse 101 altas epidemiolóxicas.
A escalada de infeccións na área pontevedresa notouse especialmente esta xornada nos centros hospitalarios, onde permanecen ingresados por covid 54 afectados, sete máis que o domingo. Deles 45 evolucionan en planta repartidos entre o Complexo Hospitalario Universitario de Pontevedra (34), o Hospital do Salnés (7) e o Hospital QUirónSalud Miguel Domínguez (4), mentres que 9 persoas evolucionan na Unidade de Coidados Intensivos de Montecelo (UCI).
Desde o inicio da pandemia superaron o coronavirus 22.406 persoas en Pontevedra e O Salnés, rexistrándose 217 falecementos de pacientes coa infección activa.
En canto á realización de probas, o Sergas realizou 1.240 PCR na última xornada.